Ao ler Windows, Android ou iOS, acudirá á túa cabeza a imaxe dun móbil ou computador, a final de contas, son os sistemas operativos que dan vida aos nosos dispositivos electrónicos. Pero se falamos dun vehículo autónomo… ¿Utiliza Windows? Quizá Android? Ningún deles, a resposta é ROS, Robot Operating System, en castelán, Sistema Operativo para Robots.
Creado en 2007 pola empresa Willow Garage e actualmente mantido pola Fundación Open Robotics, ROS alcanzou gran popularidade por varios motivos:
- É unha plataforma de software de código aberto. Noutras palabras, permite que os usuarios accedan, revisen, modifiquen e distribúan o software de forma gratuíta, sen restricións de licenza e sen a necesidade de permiso do autor orixinal.
- Proporciona unha gran cantidade de ferramentas que facilitan o desenvolvemento de aplicacións de robótica. Isto inclúe ferramentas para a comunicación entre procesos, o control de robots, o procesamento de imaxes e a navegación, entre outras cousas.
- É compatible cunha gran cantidade de plataformas de hardware e linguaxes de programación, o que o fai moi versátil e fácil de usar para programadores de diferentes habilidades e niveis de experiencia.
Algúns exemplos
Seguro que algunha vez viches un vídeo dun robot de Boston Dynamics, unha empresa estadounidense de robótica, que baila ou fai parkour, e preguntáchesche, como o fan? Pois ben, ROS é un dos ingredientes que utiliza esta empresa. Iso si, unha versión modificada, unha das vantaxes das que falabamos ao principio, ao ser de código aberto, calquera pode modificalo e adaptalo aos seus proxectos.
Tes un robot aspiradora en casa? Supoño que chegados a este punto non te estrañarás se che digo que robots domésticos tan populares como o Roomba, utilizan ROS. A lista é longa: drons, robots industriais e mesmo a marca de vehículos eléctricos máis coñecida do momento, Tesla.
E se cho estás preguntando, si, ROS é a base do vehículo autónomo do Living Lab de Santiago de Compostela. Unha plataforma que axudará aos nosos usuarios nas súas investigacións e a lanzar novos modelos de negocio.